دیرم وابیدی و دل و رچمس از نو

دیرم وابیدی و دل و رچمس از نو چکنم
آسمون من ســـرم انگا رمس از نو چکنم
رگلم یخ زه و خینم رچـــــس از نو چکنم
گل باغم و تغرسی تکــــــس از نو چکنم
کمرم بورس و جون جاز و شــونوم افتا
چـــــــکنم درد بدی بی که و جـــونم افتا
ور پهلی بنیو زخم تور ســـــــــــــنگینه
بی تو رفتن به خدا تا دم در ســـــنگینه
یه دمون دیر تو بیده چقذر ســـــــنگینه
چکنم های وای داغ دل و درد گـــرون
واتر ای بو و تیم خرس همی طو دوپرون
چکنم های که تیفون بـــلا ول کن نی
لجن وابیده همی جا و خلا ول کن نی
باغ وابیده بیابون و قلا ول کــــن نی
من سینش ندرآیی و صلا ول کن نی
غیر باد واکپنیم ار من سینش ندریم
باید وابیم و تش و هیچ و من تش ندریم
تا که هرچی سگ و سوتک و ای من دکه ی
نوریسم کلمون و پس معرکه ی
کارمون شیون و کز کردن و لوردکه ی
تا قیومت دلومون های و لرزه و چکه ی
نورسیم خوراک سگ و توره وابیم
ره نه ایبندن وریمون و د بی ره وابیم
زمسون تا زه و هوم کاره دندون وابی
از هم لحظه که ای باغ بیابون وابی
گل هفت زرده کا آموخت تلکدون وآبی
شوپر کور یه پا مرغ غزل خون وآبی
خبری تازه و او چهچه بلبل نیسی
یه پچه عشوه و دور تیل گل نیسی
یو چه بدختی هی پشت و افتو کردن
بی شو –شوپرک و شوک شلی تو کردن
جر خل کردن و چو خردن و بوبو کردن
گل نشکفته باغی نه هلی هو کردن
مث ماگی گورش مرده چنه بوره زدن
زیر کومه ی دلت اومرو تش بی دیده وری
کم بگو بخت مو چی بخت تو خوسیده وری
کنده غم و بغل کردن و هی کوره زدن
سر تلکدون گل هفت زرده نه کی دیده وری
دهس و ری دهس نهادن چه منش بیده وری
کووری تا یکی وابیمو یه گاله ای بزنیم
دو . سه تا پیک شراب دو سه ساله ای بزنیم
تا نگن کر غره وابیده یهو من گل و شل
وازنیمون بلی و بایومه سر جی کره تل
تا بپیچه من ده مثل نها ساز و دهل
غاچو دومبیل و ملو سربکشه تا سر تل
تا رو ورداره ون تنگسه و گو بازی
داوتی رو بگره . رو بگره چو بازی
تا بفهمن که هنی زنده و من مال هسی
تیله یل تازه فرو کرده ومن چال هسی
پازن وا مخرو کهره کر چال هسی
آرشی که بزنه تیرشه من خال هسی
تا بفهمن که نیبو که سر روزه بری
خاری و باده و آوریشمه من دوزه بری
تا بفهمن که کلو نیتره ماله بخره
موری بال دراورده بلال بخره
زهلی نحس نجس خین شکال بخره
پخشه غوزه وابو و کوگ من باله بخره
تا بفهمن که زیر خولمر چه تش و تنگی هه
پس ای هیچ نگفتن هنی هم بنگی هه

شعر از شاعر بزرگ احمد انصاری فهلیانی